Белград, 4 август 2025 (МИА) - Јавниот долг на Србија на крајот на јуни изнесуваше 38,55 милијарди евра, што е 43,7 проценти од БДП, соопшти српското Министерство за финансии.

Во споредба со крајот на минатата година, и долгот и неговото учество во БДП се намалија, бидејќи на 31 декември 2024 година, долгот изнесуваше 38,87 милијарди и учествуваше во БДП со 47,2 проценти.
Во првата половина од годината е остварен дефицит на националниот буџет од 36,4 милијарди динари, што е подобро од буџетскиот план за 133,4 милијарди, имајќи го предвид планираниот дефицит од 169,8 милијарди динари, објави Министерството за финансии.

Приходите изнесуваа 1.107,4 милијарди динари, а расходите 1.143,8 милијарди динари. Во јуни е остварен суфицит од 35,7 милијарди динари.

Во текот на јуни беа собрани приходи во износ од 227,5 милијарди динари, од кои даночните приходи изнесуваа 208,4 милијарди. зш/