• петок, 19 април 2024

Шолц вети истрага за безбедносна снимка што протече во руски медиуми

Шолц вети истрага за безбедносна снимка што протече во руски медиуми

Рим, 2 март 2024 (МИА) – Германскиот канцелар Олаф Шолц енеска вети брзо разјаснување откако Русија објави снимка на германски офицери на воздухопловните сили кои разговараат за поддршка за Украина.

Говорејќи на маргините на посетата на Ватикан, тој ја опиша ситуацијата како „многу сериозна работа“.

Разговорот меѓу германските претставници на одбраната вчера го објави шефицата на руската државна телевизија РТ, Маргарита Симонјан.

На снимката, високи офицери на воздухопловните сили разговараат за теоретски можности за распоредување на германски крстосувачки ракети Таурус во Украина.

Шолц постојано ја отфрла можноста за испорака на ракети Таурус за Украина, и покрај постојаните барања од Киев, тврдејќи дека стравува дека Германија би можела подлабоко да биде вовлечена во војната што Кремљ ја почна во февруари 2022 година.

Видеото, исто така, содржи дипломатски чувствителна референца за тоа дека Британците имаат „неколку луѓе на терен“ во Украина, во врска со распоредувањето на нивните крстосувачки ракети „Storm Shadow“ во земјата, пренесува ДПА.

Шолц, во контекст на дебатата за Таурус, рече дека „она што го прават Британците и Французите во однос на контролата на целта и придружната контрола на целта не може да се направи во Германија“, без да каже други детали.

Некои го гледаат ова како индикација дека француските и британските сили ја поддржуваат контролата на крстосувачките ракети што и се доставуваат на Украина. Лондон веднаш негираше.

На прашањето на ДПА за можните дипломатски последици од пресретнатиот разговор, Шолц рече: „Затоа ова сега се разјаснува многу внимателно, многу интензивно и многу брзо. Тоа е исто така неопходно“.

Инспекторот на воздухопловните сили Инго Герхарц бил меѓу присутните на состанокот кој бил сниман и за кој се вели дека бил подготовка за брифинг со министерот за одбрана Борис Писториус.

Разговорот што се слуша на снимката се однесува на тоа дали крстосувачките ракети Таурус теоретски ќе бидат технички способни да го уништат мостот изграден од Русија до украинскиот полуостров Крим, анектиран од Москва со кршење на меѓународното право.

Дискусијата, исто така, се однесува на тоа дали Украина би можела да го изврши нападот без учество на германските вооружени сили. На снимката јасно се посочува дека германските пратеници не се подготвени да му дадат на Киев крстаречки ракети.

Извори за ДПА претходно денеска изјавија дека снимката е автентична и дека дискусијата била хостирана на Webex, американска онлајн платформа за конференции.

Германското Министерство за одбрана истражуваше дали комуникацијата била пресретната. „Федералната канцеларија за воена контраразузнавачка служба ги иницираше сите неопходни мерки“, изјави синоќа портпаролката на Министерството.

Германските пратеници за безбедност одговорија со повици за подобрувања. „Итно треба да ја зголемиме нашата безбедност и контраразузнавање, бидејќи очигледно сме ранливи во оваа област“, изјави за новинската агенција Redaktionsnetzwerk Deutschland (RND) Мари-Агнес Штрак-Зимерман, претседателка на Комисијата за одбрана на Бундестагот.

„Се поставува прашањето дали ова е еднократен инцидент или структурен безбедносен проблем“, рече Константин фон Ноц, претседател на парламентарната комисија за контрола.

Објавувањето на снимката покрена широки шпекулации за времето на нејзиното објавување, при што Штрак-Зимерман шпекулираше дека Русија има за цел да го одврати Шолц да му даде на Киев проектили Таурус.

Таа за RND изјави дека шпионажата е „дел од руската кутија со алатки за хибридна војна“, додавајќи дека не е изненадувачки што биле пресретнати разговори. „Беше само прашање на време кога ќе излезат во јавноста“, рече таа.

Други шпекулираа дека протекувањето на разговорот од Бундесверот би можело да биде руски обид да ја оттргне јавната дебата подалеку од неодамнешните откритија или погребот на Алексеј Навални. јт/

Фото: ЕПА

Можно е и ова да ти се допаѓа

Остани поврзан