Анкара, 22 август 2025 (МИА) – Шефот на турската дипломатија Хакан Фидан ќе претседава со средбата на Организацијата за исламска соработка (ОИЦ), што ќе се одржи во Џеда, Саудиска Арабија на 25 август.

Турција сега е ротирачки претседател со ОИЦ. Тема на состанокот во Џеда ќе биде ситуацијата во Појасот Газа, а се очекува Фидан да го претстави ставот на Турција за војната во палестинската енклава. Анкара ги осудува израелските операции во Појасот Газа, а ситуацијата ја оценува како хуманитарна катастрофа.

Според турските медиуми, Хакан ќе го повтори ставот на официјална Анкара дека е невозможно изнаоѓање на решение само со учество на Израел и Палестина, како и оти Турција не поддржува иселување на Палестинците. Тој исто така ќе апелира до меѓународната заедница да изврши притисок врз Израел,

Турција е непоколеблива дека нема да ги затвора очите пред политиките на Израел за раселување на Палестинците од Газа и дека постигнувањето траен и праведен мир бара признавање на Палестина. Затоа, земјата ќе ја изрази својата континуирана силна поддршка за планот на Организацијата за исламска соработка и на Арапската лига за обнова на Појасот Газа, наведуваат турските медиуми.

Последната средба на министрите за надворешни работи на земјите-членки на ОИЦ беше во Истанбул на 21 и 22 јули, кога Турција го презеде едногодишното претседателство со Организација.

ОИЦ е меѓународна организација со постојана делегација во Обединети нации, во која членуваат 57 земји каде што исламот е државна, мнозинска или малцинска религија. Првата исламска конференција на министри за надворешни работи е одржана во март 1970 година во Џеда.

ОИЦ, според повелбата, се залага за исламска солидарност помеѓу земјите-членки; за зајакнување на соработката во сите сфери; отстранување на расната дискриминација и колонијализмот; мир и безбедност засновани на правда; поддршка на борбата на Палестинците за остварување на нивните права и ослободување на нивната територија; поддршка за сите муслимани кои се борат да го зачуваат своето достоинство, независност и национални закони и за соработка и разбирање меѓу земјите-членки и другите држави. ми/

фото: ЕПА