Амстердам, 2 декември 2024 (МИА) - Светската асоцијација на фудбалерите (ФИФПро) ги објави своите номинирани за идеалниот машки тим на годината. На списокот има вкупно 26 фудбалери.

Од глобалниот сојуз на фудбалери повторно потенцираат дека ова е единствената светска фудбалска награда која ја одредуваат исклучиво професионалните фудбалери. Над 28.000 професионални играчи од 70 земји гласаа за својот тим на годината, што е рекорден број.

Најмногу номинирани (11) се играчи од Премиер лигата, а вклучени се и освојувачот на „Златната топка“ Родриго Хернандез-Родри и неговите соиграчи од Манчестер Сити, Ерлинг Халанд, Фил Фоуден, Рубен Диас и Едерсон.

Ла Лига ја претставуваат 7 играчи - вториот во пласманот за „Златната топка“ - Винисиус Жуниор, како и неговите соиграчи од Реал Мадрид, Килијан Мбапе, Џуд Белингем, Лука Модриќ, Даниел Карвахал и Федерико Валверде. Таму е и Тони Крос кој веќе се откажа од фудбалот. Од Барселона во рангирањето е вклучен само големиот талент на Каталонците Ламин Јамал.

Бундеслигата има 4 претставници - ѕвездите на Баерн Минхен Хари Кејн, Џамал ​​Мусиала и Мануел Нојер, како и десниот дефанзивец на Баер Леверкузен Џереми Фримпонг. 

Повторно фрапантно е што како и лани во рангирањето не е вклучен ниту еден играч од италијанската Серија А. Лаутаро Мартинез, рангиран на 7-то место за „Златната топка“, повторно го нема, исто како што беше во номинациите за најдобри играчи на ФИФА.

Во рангирањето се и мегаѕвездите Кристијано Роналдо и Лионел Меси, кои се единствените во него кои играат надвор од Европа.

Се оценува настапот на играчите од 21 август 2023 година до 14 јули 2024 година. Исто така, потребно е играчите да се појавиле на најмалку 30 официјални натпревари во овој период.

Во најдобрите единаесет ќе има еден голман, тројца одбранбени играчи, тројца играчи од средниот ред и тројца напаѓачи кои добиле најмногу гласови од своите врсници. На сличен начин беа објавени и 26-те номинирани за идеален женски тим.

Победниците ќе бидат објавени во понеделник на 9 декември во дигиталните платформи на FIFPro, а тоа ќе се случи во 14 часот по наше време.

Голмани: Едерсон, Емилијано Мартинез, Мануел Нојер

Дефанзивци: Дани Карвахал, Џереми Фримпонг, Вирџил ван Дајк, Рубен Дијаз, Вилијам Салиба, Антонио Рудигер, Кајл Вокер

Среден ред: Џуд Белингем, Кевин Де Бруин, Фил Фоуден, Тони Крос, Лука Модриќ, Џамал ​​Мусиала, Родри, Федерико Валверде.

Напаѓачи: Ерлинг Халанд, Хари Кејн, Килијан Мбапе, Лионел Меси, Кол Палмер, Кристијано Роналдо, Винисиус Жуниор, Ламин Јамал. дс

Фото: Архива