Скопје, 3 декември 2023 (МИА) - Ученици од основни и средни училишта од општина Гевгелија вчера беа во посета на Медиумската информативна агенција (МИА) во рамки на проектот „Јас=Медиум“.

Проектот ја обработува медиумската писменост кај учениците, а го спроведува ЗГ „Од станица до граница“ од Гевгелија. 

Учениците од средното училиште „Јосиф Јосифовски“, од основните училишта „Крсте Мисирков“ и „Владо Картанџиев“ од Гевгелија и од основните училишта „Ристо Шуклев“ од Негорци и „Климент Охридски“ од Миравци се запознаа со процесот на работа во МИА и со тоа како новинарите ги проверуваат информациите пред да ги објават. На учениците им беше укажано како да ги препознаат лажните вести и кои алатки да ги користат при проверка на информациите. 

Учениците го посетија и едно од студијата на Агенцијата каде им беше презентиран процесот на снимање интервјуа.

Проектот „Јас=Медиум“ се реализира во рамки на Регионалната програма за локална демократија во Западен Балкан 2 – ReLOaD2, финансирана од Европската унија и имплементирана од Програмата за развој на Обединетите нации (УНДП). Проектот е кофинансиран од Општина Гевгелија. бак/нд/