Лондон, 13 март 2021 (МИА) – Германскиот стратег Томас Тухел испиша денеска историја како тренер на Челзи, откако лондонскиот премиерлигаш и во 12-от меч во сите натпреварувања под негово водство остана непоразен. Челзи попладнево одигра без голови на гостувањето кај Лидс, во рамки на 29 коло во Премиер лигата, со што Тухел го израмни рекордот на Фелипе Сколари како тренер со најдолга стартна серија без пораз. Лондонскиот тим во десетте премиерлигашки натпревари под водство на Тухел, кој седна на клупата на Челзи на 26 јануари, веќе одигра три натпревари без голови, еден повеќе отколку што запиша во 57-те натпревари под водство на неговиот претходник Френк Лампард. ег/