Анкара, 21 март 2024 (МИА) - Турција и Советот за соработка на Персискиот залив (ГЦЦ) потпишаа договор за почеток на преговори за договор за слободна трговија, изјави денеска турскиот министер за трговија Омер Болат.

По долгогодишни тензии, Турција започна дипломатска офанзива во 2020 година за да ги подобри односите со земјите од Заливот, особено со Обединетите Арапски Емирати и Саудиска Арабија.

Оттогаш склучи договори во вредност од милијарди долари со арапските држави, вклучувајќи го и Катар, земјата со која одржува најблиски односи.

„Договорот ќе ја либерализира трговијата со стоки и услуги, ќе ги олесни инвестициите и трговијата и ќе ја зголеми размената на нашата земја со регионот“, напиша Болат на платформата X.

Анкара смета дека разговорите ќе завршат за кратко време, а Болат нагласи дека со договорот ќе се формира една од најголемите зони за слободна трговија во светот, вредна повеќе од 2,4 билиони долари.

ГЦЦ го сочинуваат Саудиска Арабија, ОАЕ, Катар, Кувајт, Оман и Бахреин.

Земјите од Персискиот залив очекуваат Турција да им помогне да ги развијат нивните индустрии и да ги пренесат технологиите, во обид да ги диверзифицираат нивните економии подалеку од нафтата. паг/

Фото: ЕПА