Скопје, 11 јули 2024 (МИА) - Собраниската Комисија за економски прашања, труд и енергетска политика попладнево, во рамки на втората седница, ги разгледа и ги даде на натамошна постапка Предлог-законот за изменување и дополнување на Законот за енергетика, Предлог-законот за изменување и дополнување на Законот за Геолошкиот завод на Република Македонија, Предлог-законот за изменување и дополнување на Законот за енергетска ефикасност, Предлог-законот за изменување и дополнување на Законот за концесии и јавно приватно партнерство и Предлог-законот за изменување и дополнување на Законот за метрологијата, кои треба да се донесат по скратена постапка.

Членовите на Комисијата ги поддржаа и Предлог-законот за изменување и дополнување на Законот за минерални суровини, Предлог-законот за изменување и дополнување на Законот за контрола на предметите од скапоцени метали, Предлог-законот за престанување на важењето на Законот за основање на Агенција за енергетика на Република Северна Македонија, Предлог-законот за изменување и дополнување на Законот за задолжителни нафтени резерви и Предлог-законот за изменување и дополнување на Законот за техничката инспекција, кои исто така треба да се донесат по скратена постапка.

Сите десет предлог-закони се поднесени од пратеници на ВМРО-ДПМНЕ. За ниту еден од нив не се поднесени амандмани, ниту се јави за збор некој од членовите на Комисијата кои присуствуваа на седницата.

Како што објасни претседателот на Комисијата, Бојан Стојаноски, целта на предлог-законските решенија е дооформување на надлежностите на Министерството за енергетика.

-Во текстот на законите кои досега ја имаат регулирано надлежноста на Министерството за економија, се менува името од Министерство за економија во Министерство за енергетика. Но, втората работа, која е особено важна, е дека на Агенцијата за енергетика и престанува важноста како институција и таа оди во надлежност на Министерството за енергетика. Се укинуваат Управниот одбор и директорот, со што се исполнува уште едно предизборно ветување за намалување на бројот на институциите. Во Агенцијата за задолжителни нафтени резерви се укинува Управниот одбор, а директорот има обврска да дава шестмесечни и годишни извештаи пред Министерството. Сметаме дека вака ќе биде побрза, порационална и пооптимизирана работата на Министерството за енергетика, истакна Стојаноски, според кој, ова образложение се однесува на сите десет предлог-закони. мч/сст/

фото: принт скрин