Ченгду, 10 декември 2025 (МИА) – Македонските пингпонгари Матеја Смолиќ и Јован Пармачки ги заокружуваат подготовките во Кина. Тие имаат прилика да тренираат со најперспективните пинг-понг играчи во светски рамки. 

Нашите млади пингпонгари се придружувани од селекторот Сашко Богатинов за кој ова е уште едно искуство и надградба како професионалец во спортот.

- Учеството на светскиот камп е дел од соработката која Пингпонгарската федерација на Македонија ја има и негува со Амбасадата на Народна Република Кина во Македонија, а со поддршка на Меѓународната пинг-понг федерација, соопштија од нашата федерација. 

Кампот се одржува во градот Ченгду и трае од 3-ти до 13-ти Декември.

Инаку, на домашен терен, во Пехчево до петок младите таленти во возрасните категории до 11 и 13 години тренираат со селекторот Милош Миленковиќ и тренерот Зоран Јованоски. Избрани се 14 таленти од повеќе градови и клубови. Кампот е дел од програмата на Федерацијата за вложување во младите надежи и поддршка на клубовите. зс/

Фото: ЕПА