Скопје, 27 декември 2024 (МИА) - Претседателката Гордана Сиљановска-Давкова ја врачи Големата годишна награда за најуспешно реализирано архитектонско дело во 2024 година на авторите Методи Хаџи-Андов, Сашо Андријевски, Игор Сугарчев и Димитар Стефановски, од проектантското биро „Параметар студио“, за проектот Мултинаменски комплекс во општина Петровец, Скопје.

Големата годишна награда традиционално ја доделува Асоцијацијата на архитекти на Македонија, под покровителство на претседателот на Републиката.

Сиљановска-Давкова, како што информира претседателскиот кабинет, истакна дека Асоцијацијата е предводник во архитектурата, но и во одбраната на професионалните вредности и промоцијата на македонската архитектура, вклучувајќи ја и македонската современа архитектура на светската сцена. 

- За мене, архитектурата е стремеж да се достигне нешто високо, убаво, естетско и не само во духовна смисла и во филозофска смисла, но и во градителска смисла, но мислам дека најважното е што таа трага по одговори на основните човекови потреби и слободи. За мене, вие, архитектите сте креативците кои го одбележуваат духот, традицијата, трендот и влегуваат во историјата, во епохата, па и во милениумите и стануваат дел од националната, регионалната, но и светската културна ризница. Јас верувам дека тоа воопшто не е мала или едноставна работа и дека е симбиоза, спој на многу елементи. Знам дека вие трагате и се стремите  кон совршенство, знам дека сакате да ја споите природата со човекот и неговото место, се разбира, во секојдневниот живот, изјави Сиљановска-Давкова.

Според неа, оваа награда, верувам дека, не само што е вивисекција на вашите архитектонските остварување во период од една година, што секако е кус период за дефинитивен став или критика, но е сигурно индикатор за да видиме каде сме успешни, кои се трендовите, какви сме во однос на другите, а тоа вие самите самоктирично ги проценувате. И да не заборавиме, како што рече, македонската архитектура има длабоки темели и може да се пофали со градби кои се дел и од светското наследство.

- Македонските архитекти и архитектурата имаат длабоко наследство и оставнина која многумина ја почитуваат, како што е тоа на пример Меѓународната академија за архитектура која истакнува дека ние имаме повеќе истакнати архитекти, но не само во дизајн или градба, туку и како професори. Тоа значи и школа, наш стил. И по нашата извонредност во градбата треба да бидеме препознатливи и во иднина, а секако не по урбанистичките ловци на профити, занемарувајќи ги човечките потреби, оставјаќи хаос и неодржливи градови или станбени блокови во кои секојдневието е барикадирано со архитектонски пречки, подвлече Сиљановска-Давкова

Денешнава награда, како што напомена, потврдува дека имаме блескави архитекти и архитектура, и токму тие треба да бидат пример како да се однесуваме понатаму.

- Да пронајдеме одговор за грешките, да ги примениме принципите на хуманизмот во архитектурата, да се вратиме на македонската мера, на нашиот златен пресек. Тоа значи и почитување на основните човекови права. Ако се потсетиме на Едгар Морено, ќе истакнеме дека и архитектите се втмелени и го креираат духот на времето, но не само како гола фраза или кич производ, туку како суштина во која е обмислена човечноста, потенцира претседателката. мд/аа/

Фото: Кабинет на претседателката Сиљановска-Давкова