Се слави младо вино во Тиквешко, следната недела планинарска акција по винскиот пат
Неготино, 12 ноември 2022 (МИА) - Традиционално секој ноември во Тиквешко се организираат настани во чест на младото вино, а планинарите од „Фри хајкерс“ вечерва го најавија атрактивниот планинарски марш „По патот на виното“. Маршот ќе се реализира следната недела, на 20 ноември.
- Љубителите на планинарството имаат можност да чекорат по винскиот пат во Дисанијата, позната по многу квалитетно грозје и производи од грозје. Патеката минува низ лозови плантажи што раѓаат грозје во почиста и поздрава околина. Заедно ќе ги славиме грозјето и производите од грозје, во пресрет на празникот Свети Архангел Михаил, соопштија од планинарското спортско друштво.
Станува збор за кружна винска патека, долга 16 километри. Турата е средно тешка. Се стартува од Долни Дисан, преку Јануица, Венецот, Студена вода, Градот. Одморот и ручекот се во новоотворениот планинарски дом „Дедо Ило Јанчев“, а маршот завршува кај почетната точка во Долни Дисан. свд/мд/
