Шарм ел Шеик, 13 октомври 2025 (МИА) - Додека американскиот претседател Доналд Трамп го имаше својот говор пред израелскиот Кнесет, египетскиот претседател Абдел Фатах ал-Сиси ги пречекуваше светските лидери во Шарм ел-Шеик за самитот во Газа, објави ДПА.

Меѓу оние што пристигнаа во градот се турскиот претседател Реџеп Таип Ердоган, италијанската премиерка Џорџа Мелони и катарскиот емир Шеик Тамим бин Хамад Ал Тани. Францускиот претседател Емануел Макрон и палестинскиот претседател Махмуд Абас, исто така, пристигнаа во Египет. Се очекува Трамп да им се придружи подоцна во текот на денот.

Лидерите ќе учествуваат на церемонијата на потпишување на договорот меѓу Израел и Хамас, посредуван од Египет, Катар, Турција и САД.

На состанокот учествуваат претставници од повеќе од 20 земји и меѓународни организации. Меѓу очекуваните гости се германскиот канцелар Фридрих Мерц, британскиот премиер Кир Стармер, генералниот секретар на ОН Антонио Гутереш и саудискиот министер за надворешни работи Фајсал бин Фархан Ал Сауд. Претставниците на Хамас и Израел нема да присуствуваат лично.

По церемонијата, се очекува претседателот Сиси да даде кратка изјава, додека Доналд Трамп се очекува да одржи подолг говор.сд/

фото: ЕПА