Вашингтон, 21 јули 2024 (МИА) - Американскиот Стејт департмент ги повика американските граѓани да не патуваат во Бангладеш поради тековните „граѓански немири“. Дипломатското претставништво соопшти дека сите американски државни службеници во Бангладеш кои немаат итни должности може да ја напуштат земјата.

Бангладеш оваа недела беше зафатен од масовни протести на студентите кои бараат укинување на владините квоти за работни места. Триесет проценти од местата во овој сектор се дадени на роднини на борците за слобода во Војната за независност од Пакистан во 1971 година.

Во исто време, стапката на невработеност кај младите е многу висока. Во земјата со население од околу 170 милиони луѓе, има речиси 32 милиони млади луѓе кои не студираат или работат.

Студентските протести брзо прераснаа во судири со полицијата, во кои загинаа десетици луѓе. Владата испрати воени единици да им помогнат на спроведувањето на законот, а во некои области на земјата беа воведени мерки како полициски час, ограничувања на мобилните комуникации, забрани за јавни собири итн.

САД и Канада ги повикаа властите во Бангладеш да го почитуваат правото на мирни протести. рп/