Берлин, 15 мај 2024 (МИА) - Играчот од средниот ред Илкај Гундоган и дефанзивецот Антонио Рудигер се следните две имиња во германската репрезентација за Европското фудбалско првенство летово.

Германскиот фудбалски сојуз избра неконвенционален начин да го објави составот преку традиционални и социјални медиуми, инфлуенсери, ТВ познати личности, уметничка галерија, националните превозници Луфтханза, па дури и сопственик на продавница за крофни пред официјалното претставување на тренерот Јулијан Нагелсман, закажан за четврток.

До среда попладне беа објавени вкупно 16 играчи. Конечниот список, кој мора да биде откриен до 7 јуни, не може да има повеќе од 26 играчи, но Нагелсман би можел да избере повеќе играчи на својот прелиминарен список во четврток.

-Се работи за создавање многу емотивни моменти за оваа земја, за навивачите, за децата, за луѓето кои се на стадионот, кои се пред телевизорот, кои се надвор и на улиците, изјави неодамна Нагелсман за Magenta TV во однос на Евро 2024.

Моќниот дефанзивец на Реал Мадрид, Рудигер, беше објавен од сопственикот на продавницата за крофни во Берлин во која играчот одел како ученик.

-Здраво Антонио, добар човеку. Сакав да те известам дека си во тимот за Европското првенство. Бидејќи и ти беше мој клиент како ученик, првите 50 ученици ќе добијат бесплатна крофна денес, рече тој во видео на Инстаграм.

Рудигер одговори во делот за коментари: „Хишар ќебап = најдобриот ќебап. Со нетрпение го очекуваме турнирот“.

Гундоган беше претставен и во главниот град, каде на 14 јули ќе се одржи финалето на еврото, преку билборд на Александарплац.

Гундоган, кој има 77 натпревари, беше именуван за капитен минатата година кога Мануел Нојер беше надвор од теренот поради скршеница на ногата, а тренерот Јулијан Нагелсман рече дека ќе остане капитен иако сега се врати голманот Нојер. дс

Фото: Архива