Каиро, 19 ноември 2025 (МИА) - Египетскиот претседател Абдел-Фатах ал-Сиси и неговиот руски колега Владимир Путин денеска преку видео врска се придружија на церемонијата со која се одбележа следниот чекор кон изградбата на првата египетска нуклеарна централа.

Церемонијата го означи инсталирањето на сад под притисок за првата единица во централата во градот ал-Даба на медитеранскиот брег на Египет.

Египетското претседателство го нарече настанот „клучен чекор“ во унапредувањето на проектот, кој се гради со руска помош и финансирање.

Во 2015 година, Египет и Русија потпишаа договор за изградба на централата. Две години подоцна, договорот стапи на сила за време на посетата на Путин на Каиро.

Путин во среда изјави дека изградбата на објектот напредува „успешно“ благодарение на руската помош.

„Сега преминуваме на најважната фаза од технолошкото опремување на централата и ќе можеме да започнеме со производство на електрична енергија во блиска иднина - електрична енергија потребна за задоволување на потребите на растечката економија на Египет“, додаде тој.

Ал-Сиси го опиша овој чекор како сон што се остварува.

„Од средината на 20 век, нуклеарниот сон на Египет го негуваа неговите луѓе. Денес, го гледаме како станува реалност, благодарение на ([нивната) волја, напорна работа и решителност“, рече тој.

Тој додаде дека врските на Египет со Русија се стратешки „засновани на меѓусебно почитување и разбирање, без оглед на регионалните и меѓународните предизвици“.

Сметана како еден од мегапроектите на Египет, централата има четири енергетски единици од 1.200 мегавати и се очекува да обезбеди околу десет проценти од потребите на Египет за електрична енергија.

Се очекува првиот реактор да почне со работа кон крајот на 2028 година.

Настанот денеска доаѓа еден ден откако де факто владетелот на Саудиска Арабија, престолонаследникот Мохамед бин Салман, постигна заедничка декларација со која ги заврши преговорите за соработка со Соединетите Американски Држави во областа на цивилната употреба на нуклеарната енергија. мс/

фото: ЕПА архива