Скопје, 30 јули 2025 (МИА) - Поради незаконско складирање отпад и предизвикување голем пожар што испуштил штетни гасови во воздухот, Основното јавно обвинителство Скопје поведе кривична постапка против две физички и едно правно лице од Шуто Оризари. Тие се товарат за кривично дело „Загрозување на животната средина и природата со отпад“, согласно член 230 од Кривичниот законик.

Според обвинителството, осомничените подолг временски период складирале отпадно железо, електронски отпад, делови од стари автомобили и шасии на локација без дозвола, спротивно на Законот за управување со отпад и еколошките прописи.

На 9 јули, на истата локација избувнал неконтролиран пожар кој зафатил целата маса од отпадниот материјал. Пожарот предизвикал испуштање на чад, пепел и токсични гасови, со што била загрозена животната средина и здравјето на граѓаните.

По барање на јавниот обвинител, Единицата за атомска, биолошка и хемиска одбрана на Армијата извршила мерења и утврдила зголемено ниво на индустриска контаминација.

Од обвинителството велат дека СВР Скопје веќе обезбедиле обемна документација и други докази, а Државниот инспекторат за животна средина извршил вонреден надзор и констатирал сериозни неправилности.

Од ЈО дополнуваат истрагата продолжува со распити и вештачења за целосно расветлување на случајот. ар/дма/

Фото: МИА архива