Скопје, 7 јули 2023 (МИА) - Претседавачот со ОБСЕ и министер за надворешни работи, Бујар Османи на маргините на првата Конференција за климатски промени што се одржува денеска во Виена остварил билатерална средба со министерот за надворешни работи на Австрија, Александар Шаленберг.

- Австрија дава силна поддршката и има директен и конструктивен ангажман во справувањето со предизвиците и приоритетите на Претседавањето со ОБСЕ во 2023 година, при што Османи побарал помош од Австрија и за справување со итните прашања важни за функционирањето на Организацијата, соопштија денеска од Министерството за надворешни работи  (МНР).

Во однос на билатералната соработка меѓу Северна Македонија и Австрија, се наведува, двете земји негуваат блиски односи речиси три децении, со взаемна посветеност за натамошно унапредување на соработката.

- Северна Македонија изразува благодарност до Австрија за нејзината силна и отворена поддршка на нашиот пристапен пат кон ЕУ и залагањата за членство во ЕУ за целиот Западен Балкан. Земјава ја цени австриската поддршка на концептот на забрзана интеграција, верувајќи дека тоа ќе придонесе за зачувување на кредибилитетот на процесот на проширување, истакнал Османи на средбата со Шаленберг.

Министерот го информирал Шаленберг и за постапката за уставни измени што е во тек.

- Уставните амандмани се клучен фокус за Северна Македонија. Работиме на синхронизирање на овој процес со сите чинители во државата за негово успешно завршување до декември 2023 година, рекол Османи.

Во однос на регионалните случувања, Османи пред Шаленберг ја истакнал улогата на Северна Македонија на домаќин на дијалог Белград-Приштина во Охрид, што резултираше со значаен договор. Тој го претставил и планот од девет точки понуден како додадена вредност за деескалација на ситуацијата на северот на Косово.

- Продолжувањето на дијалогот предводен од ЕУ е исклучителна важност и за ОБСЕ и за Северна Македонија како непосреден сосед. ОБСЕ е подготвена да го поддржи и помогне спроведувањето на препораки што ќе произлезат од овој процес на терен, посочил Османи, соопштија од МНР. цр/

Фото:МНР