Штип, 23 декември 2024 (МИА) - Конкурсот за избор на спортист за 2024 година во Штип е веќе објавен, информираше на денешната прес-конференција Никола Костадинов претседател на Комисијата за спорт при Советот на Општина Штип. Тој истакна дека сите спортисти, спортски работници и клубови кои оствариле значајни резултати во изминатата година имаат право да се пријават. Пријавувањето ќе трае до 10 јануари 2025 година. По завршувањето на рокот, комисијата ќе ги разгледа пријавите и ќе одлучи кој ќе ја освоји титулата за најдобар спортист за 2024 година во Штип, врз основа на утврдените критериуми.

-Денеска Општина Штип распиша јавен повик за избор на спортист за 2024 година. Апликациите можат да се видат и симнат од сајтот на Општина Штип, како и во архивата на Општина Штип. Повикот трае до 10 јануари 2025 година. Право на учество имаат сите спортиски кои резултатите ги постигнале во штипски клубови. Учествуваат сите категории, пионери, кадети, младинци и сениори, изјави Костадинов.

Во пријавата за учество во избор на спортист за 2024 година на град Штип се наведени и критериумите кои треба спортистот да ги исполнува.

-Еден од најважните критериуми е да биде учество во клуб од Штип, но ќе бидат земени резултатите на Олимписки, Светски, Европски и Балкански првенства, додаде Костадинов.

Комисијата по 20 јануари 2025 година ќе го утврди и точниот датум кога ќе се прогласи најдобриот спортист за 2024 година во Штип. вдј/дма/

Фото: МИА