Париз, 17 јануари 2025 (МИА) - Во поткастот на легендарниот бразилски фудбалер Ромарио, актуелниот играч на Ал-Хилал, Нејмар изјави дека не жали за ништо што направил во кариерата, дека сите грешки што ги направил всушност му помогнале да созрее како личност.

Објасни зошто Барселона беше изборот на Нејмар во 2013 година наместо Реал Мадрид.

-Го следев моето срце. Сакав да играм со Меси, а Барселона беше клубот што го сакав. Секогаш сум ги следел, дури и кога Роналдињо беше таму, и секогаш сум велел дека тоа е клубот во кој сакам да бидам. И тоа се случи. Тоа беа многу интензивни денови. Неколку дена воопшто не тренирав, само одев од дома до канцеларија во обид да ја решам дилемата. Постојано ми се јавуваа од Реал Мадрид, а исто така и од Барселона. Зборував со претседателите на двата клуба, не можев да размислувам рационално. Се замислував како играм и за двата тима. На крајот го послушав своето срце, ми кажа дека треба да одам во Барселона, изјави Нејмар.

Истакна дека не ја напуштил Барселона за да стане најдобар во Пари Сен Жермен.

-Меси ме праша зошто си заминувам. Тој праша дали тоа е затоа што сакам да бидам најдобар на планетата. Ми рече дека може да ме направи најдобар на светот. Му кажав дека тоа е од лични причини. Се разбира – првенствено финансискиот дел. Беше многу подобро отколку во Барселона. Таму имав мои сонародници, сакав да играм со нив во Париз. Таму беа Тиаго Силва, Дани Алвеш, Лукас Моура, Маркињос... Сите тие се мои пријатели, истакна Бразилецот во поткастот. дс

Фото: Архива