Скопје, 16 ноември 2024 (МИА) - Во рамките на „Месецот на Пучини“, вечер со почеток во 20.00 часот на сцената на Националната опера и балет ќе биде изведена операта „Мадам Батерфлај“ од Џакомо Пучини, каде во насловната улога ќе настапи гостинката од Јапонија, Хироко Морита.

Во улогата на Пинкертон ќе настапи, Ѓорѓи Цуцковски, во улогата на Шарплес, Флорин Естефан од Романија, а во останатите улоги ќе настапат: Марика Поповиќ, Дејан Стоев, Невен Силјановски, Јане Дунимаглоски, Соња Пендовска Мадевска, Валентина Димитриевска, Олег Цуцковски, Никола Стојчески, Марко Гапо, Александар Тарабунов, Огнен Здравковски во придружба на хорот и оркестарот на Национална опера и балет.

Диригент на претставата е гостинот од Грција, Мирон Микхајлидис, режијата е на Александар Текелиев од Бугарија, сценографијата на Живојин Трајановиќ, а костимографијата на Лира Грабул. Концерт-мајстор е Климент Тодороски, хор-мајстор: Јасмина Ѓорѓеска, Ѓургица Дашиќ.

„Ако не сум трогнат, ако либретото не ми го допре срцето…тогаш тоа не е за мене“. Ова се зборовите на Пучини, за кој, како што се посочува, точно знаел што бара во едно оперско либрето, а фактот што приказната за деликатната јапонска „пеперутка“ длабоко го трогнала се огледува во секоја нота од партитурата на неговата славна опера, се посочува во најавата во пресрет на изведбата на „Мадам Батерфлај“. вг/са/

Фото:  Национална опера и балет