Научна регионална конференција на тема „Предизвиците на децата со канцер и Ковид-19“
- Коронавирусот ги покажа недостатоците, но и способноста на здравствениот систем да води грижа за пациентите со малигни заболувања и да спроведува успешни трансплатации во време на пандемија.
![Научна регионална конференција на тема „Предизвиците на децата со канцер и Ковид-19“](https://mia.mk/images/20221108204950_big_730x400_20.webp )
Скопје, 21 октомври 2021 (МИА) - Коронавирусот ги покажа недостатоците, но и способноста на здравствениот систем да води грижа за пациентите со малигни заболувања и да спроведува успешни трансплатации во време на пандемија. Ова беше заклучено на денешната научна регионална конференција на тема „Предизвиците на децата со канцер и Ковид-19", на која здравствени работници и претставници на невладини организации ги споделија искуствата со предизвиците во изминатиот период.
На конференцијата учествуваше и министерот за здравство Венко Филипче кој истакна дека поддршката кај овие пациентите е од голема важност и дека за таа цел е формирана и родителската куќа.
- Со цел поддршка и размена на искуства и посебно внимание на членовите на семејството беше организирана родителската куќа, во која се сместени семејства кои што доаѓаат надвор од Скопје и немаат каде да се сместат. Ние дури и во време кога се стави акцент на пандемија, направивме некои интервенции кои до тогаш не беа направени, имавме успешни трансплатации кои покажуваат дека дури и во такваа криза, не беа запоставиени и овие важни сегменти во здравствениот ситстем, изјави министерот.
Тој додаде дека благодарение на ова искуство, сега точно знаат во кој дел е потребна соработка со граѓанските организации.
Воедно Филипче се осврна на вакцинацијата како процес кој ќе помогне во поголемата заштита на овие пациенти и изрази надеж дека ќе се зголеми заинтересираноста за неа.
Доктор Светлана Крстевска Балканов од Универзитетската клиника за хематологија се надоврза дека генерално е потребна вакцинацијата и кај имунокомпромитираните пациенти.
- Одговорот е генерално да, со две последователни дози во период од три до четири недели кај пациентите кои во моментот не примаат терапија, додека кај пациентите кои примиле хематолошка терапија потребен е период од шест до девет месеци за реконструкција на хуморалниот имунитет, кој е посакуван одговор од вакцината, истакна Крстевска Балканов.
Таа рече дека безбедноста и ефикасноста на вакцините кај имунокомпромитираните пациенти и општата популација е идентична.
Според доктор Ирина Пановска Ставрис ваквите настани се значајни за децата со малигни болести и заклучи дека лекувањето има многу аспекти, а како најважен е токму поддршката.
Крстевска потенцира дека глобалниот пораст на малигните заболувања е присутен и во државава, но и во светските рамки, и во контекст на Ковид-19 пандемијата, според неа, потребно е поставување цели и предизвици со цел заедничко решавање.
- Како корона-пандемијата ни беше пред портите и напредуваше и растеше, така стануваше јасно дека поголема осетливост имаат возрасните пациенти со коморбилитетите. Тоа се пациенти со хронично респираторна исуфициенција, кардиоваскуларни и бубрежни заболувања, фијабетес, карциономи. Меѓутоа, воопшто се заклучи дека покрај имунокомпримитирани пациенти кои беа во голем ризик, не беа заобиколени ни младите пациенти и затоа беше потребно да се заштити оваа група на популација, објасни Крстевска.
Таа информира дека од податоците од студија објавена на почетокот на 2021 година, спроведена на три континента и во која се вклучени резултати од 38 истражувања со 3.377 пациенти со акутна форма на Ковид-19 и малигни хематолошки заболувања, произлегува дека ризикот на смртност кај возрасни е поголема, во однос на децата.
- Во студијата ризикот на смртност е компариран помеѓу две групи на возрасни пациенти и на деца, ризикот од смртност кај возрасни изнесува 34 проценти, во однос на четири отсто кај деца. Возраста е еден од главните фактори за тоа каков исход би имале овие пациенти, возраста и третманот во моментот на инфицирање со Ковид-19 се ризик фактори од развој на сериозна клиничка слика и поголема смртност кај оваа група на пациенти, појасни таа.
На првата научна регионална конференција на тема „Предизвиците на децата со канцер и Ковид 19", гостуваа и претставници на невладини организации од Хрватска и Босна и Херцеговина. свс/сп/
![thumbnail_20211021_103641](/articles/images/%d0%bd%d0%b0%d1%83%d1%87%d0%bd%d0%b0-%d1%80%d0%b5%d0%b3%d0%b8%d0%be%d0/sPEN5L8Zb/placeholder.webp?use_watermark=0)
![20211021_103613](/articles/images/%d0%bd%d0%b0%d1%83%d1%87%d0%bd%d0%b0-%d1%80%d0%b5%d0%b3%d0%b8%d0%be%d0/4Ikw2VFQX/placeholder.webp?use_watermark=0)
![thumbnail_20211021_103529](/articles/images/%d0%bd%d0%b0%d1%83%d1%87%d0%bd%d0%b0-%d1%80%d0%b5%d0%b3%d0%b8%d0%be%d0/Dqyt21vTm/placeholder.webp?use_watermark=0)