Торино, 13 јануари 2025 (МИА) - Јувентус во вторник гостува кај кандидатот за титулата во Серија „А“, Аталанта и по новото реми викендов, торинскиот гигант е решен конечно да стигне до победа, изјави тренерот Тиаго Мота.

Јуве одигра нерешено во дербито во Торино во саботата и додека резултатот значи дека тимот на Мота се уште е непоразен во првенството, нивното 12-то реми во 19 натпревари ги остава на петтото место на табелата и девет бода зад третопласираната Аталанта.

-Ние сме лути затоа што не го добивме дербито, но фокусирани сме на утрешниот предизвик против тимот кој работи многу добро. Гневни сме. Убедени сме дека работата што ја работиме е исправна за да извојуваме победи. Ќе биде одличен натпревар, многу тежок, се соочуваме со тим кој е подобар од нас, тоа го кажува пласманот. Одиме со почит, но сакаме да ја играме нашата игра за да го постигнеме резултатот што го сакаме, кој е секогаш победа“, прокоментира Мота.

Јувентус не успеа да победи против Торино без напаѓачот Душан Влаховиќ, кој го пропушти саботниот меч поради проблем со мускулот. Србинот е под знак прашалник за гостувањето кај Аталанта, додека Франциско Консеисао се уште е надвор од теренот.

-Ќе го оцениме Влаховиќ на тренинг попладнево. Сите играчи се важни. Душан е важен играч за нас, нема сомнеж во тоа. Кога е присутен, важно е, добро се снајдовме и кога го немаше, но не сме задоволни бидејќи не извојувавме победа, додаде Мота. дс

Фото: Архива