Луке, 28 март 2023 (МИА) - Јужноамериканскиот фудбалски сојуз - КОНМЕБОЛ се придружи во оддавањето почит на репрезентацијата на Аргентина по освојувањето на Копа Америка, Финалисима и Светското првенство во последните две години. Ова се случи на посебна церемонија што се одржа во Парагвај. Ѕвездата на Аргентина, Лионел Меси доби статуа.

Исто така, сите играчи на Аргентина, нивниот селектор Лионел Скалони и претседателот на локалната фудбалска асоцијација, Клаудио Тапија, беа почестени за нивните достигнувања.

Капитенот Лионел Меси и Скалони добија и реплики од освоените трофеи. Врв на програмата беше откривањето на статуата на Меси во природна големина.

Статуата на Меси ќе биде изложена во седиштето на КОНМЕБОЛ, до статуите на Пеле и Диего Марадона.

Токму Меси одржа долг емотивен говор откако беше награден.

-Ова е навистина многу. Никогаш не сонував за сето ова. Мојот сон беше едноставно да уживам во она што го уживав како дете. Да бидам професионален фудбалер и да го правам она што отсекогаш го сакав во овој живот, а тоа е да играм фудбал. Секогаш се трудев да се подобрам, да сакам повеќе и секако имав долг пат да одам. Имав многу разочарувања и загуби, но секогаш се радував. Секогаш сум излегувал да победувам и тоа е најважно. Да се ​​бориш за своите соништа, да веруваш дека се е можно и да уживаш во топката, која за мене и за нас е најубавото нешто. Многу му благодарам на Алехандро за тие два трофеи за кои зборувавме, особено овој мундијалскиот. Имавме среќа да играме во Аргентина за прв пат откако сме светски шампиони и добиваме многу љубов. Многупати сме доаѓале да играме квалификации, контроли и турнири, но овој пат, сега кога сме шампиони, за сите ни беше поинаку. Така се чувствуваме сите ние и народот, а Аргентина ни го покажува тоа цело време, истакна Меси.

Аргентина предводена од Меси лани го освои Светското фудбалско првенство во Катар. зс/

Фото: ЕПА