Скопје, 6 ноември 2023 (МИА) - Ја известуваме јавноста дека првично уште на 30.11.2022 година, предметот за случајот „ТНТ“ е доставен на второстепено одлучување во Апелациониот суд Скопје. За периодот од 8 месеци пред истиот да биде административно вратен со барање за исправка, како и за период откако решението за исправка заедно со списите од предметот биле доставени на Апелациониот суд Скопје, како суд не може да знаеме што се случувало и зошто не било одлучувано, соопштуваат од Основен Кривичен суд Скопје.

Оттаму велат дека е неспорен фактот дека Апелациониот суд Скопје, постапувајќи по жалбите против пресудата за предметот административно го вратил предметот во Кривичниот суд Скопје со барање за исправка на технички неусогласености во писмениот дел.

- Со оглед да се работи за период на судска ферија, а имајќи предвид дека судечкиот судија кој постапувал по предметот во меѓувреме почина, па неговите предмети беа прераспределени кај друг судија, постапувајќи по барањето, Кривичниот суд изготви решение за исправка и истото, на 12.09.2023 година, заедно со сите списи на предметот го вратил на повторно одлучување во Апелациониот суд, велат оттаму.

Од Кривичен потсетуваат на нивните апели од потребата за мериторно одлучување на Второстепениот суд при жалбени постапки, особено за предметите од јавен интерес бидејќи, според нив, тоа е единствен начин за постигнување на начелото за судење во разумен рок, но и економичност и ефикасност на постапките.

Соопштението следува по денешната седница за случајот „ТНТ“ во Апелациониот суд Скопје на која одбраната побара одбивателна пресуда поради апсолутна застареност на делото согласно измените на Кривичниот Законик.

Во првостепената пресуда девет години затвор доби експремиерот Никола Груевски, три години поранешниот министер за транспорт и врски Миле Јанакиески и четири години поранешниот градоначалник на Општина Гази Баба, Тони Трајковски, за рушењето на објектот „Космос“ на Фијат Цаноски во 2012 година. 

Во случајот затворска казна од четири години доби и тогашната градежна инспекторка Елизавета Најдовска, додека три службени лица од Општината добија ослободителна пресуда. Сите се товареа за „злоупотреба на службената положба и овластувања“.

Сопственикот на компанијата „ФИНЕ“, Фијат Цаноски, вчера на прес-конференција обвини за судски преседан во Апелациониот суд и тврдеше дека се подготвува застареност на предметот „ТНТ“ со што компанијата нема да ја добие оштетата од 11 милиони евра.

- Судијата известител и претседател на советот Ѓоко Ристов наместо да постапи согласно одредбите од Законот за кривична постапка (ЗКП) за предметот и да закаже интерен термин за советување и гласање по предметот, тој закажува нова јавна седница за 06.11.2023 година, сè со една единствена цел, знаејќи дека ако таа се одржи, тогаш Советот ќе мора да донесе само една единствена одлука – да констатира застареност за кривично гонење спрема обвинетите и „ФИНЕ“ засекогаш да остане без својата отштета од 11 милиони евра, рече Цаноски.

Според првостепената пресуда на Кривичниот суд, Цаноски треба да добие отштета од речиси 11 милиони евра поради уривањето на комплексот.

На ова вчера реагираше Апелација, од каде посочија дека постапувањето на судечкиот совет е согласно Законот за кривична постапка.

-По одржаната јавна седница на ден 08.05.2023 година, во тек на процесот на донесување на одлука, членовите на советот разгледувајќи ги жалбите на повеќе заседанија, се впуштија во оцена на основаноста на жалбените наводи, а со оглед дека се работи за обемен и комплексен предмет, со огромен број докази, и пред мериторно одлучување, поради констатираните неусогласености помеѓу записникот за советување и гласање на првостепениот суд и изворникот на првостепената пресуда со писмениот отправок на изготвената пресуда во делот на изречената казна на еден од обвинетите, како и во делот на засметување на притворот во изречените казни, на заседанието одржано на ден 11.07.2023 година, членовите на судечкиот совет одлучиле предметот со сите списи административно да се врати на првостепениот суд заради отстранување на горенаведените неусогласености кои претставуваат процесна пречка за донесување на второстепена одлука, соопштија од Апелација.

Дополнија дека првостепениот суд постапувајќи по административното враќање на списи на овој суд, на 01.09.2023 година донел Решение за исправка коешто е експедирано до странките на 11.09.2023 година.

- По комплетирање на списите на предметот на ден 05.10.2023 година, истиот повторно е доставен до Апелациониот суд Скопје, по што на 06.10.2023 година е испратен на мислење по изјавените жалби на пресудата до Вишото јавно обвинителство Скопје, чиј предлог е примен во Судот на 12.10.2023 година, по што веднаш е закажана јавна седница за ден 06.11.2023 година, на барање на странките, дополнуваат оттаму нагласувајќи дека досегашното постапување од страна на судечкиот совет е согласно одредбите од ЗКП. ар/аа/

Фото: МИА архива