Заврши реставрацијата на пештерската црква „Света Богородица“ на островот Мал Град, кај Пустец
Дебар, 24 август 2024 (МИА) - Заврши реставрацијата на пештерската црква „Света Богородица“ на островот Мал Град, кај Пустец, Мала Преспа, што се одвиваше под надзор на Регионалната дирекција за културно наследство од Корча.
- Уште едно исполнето ветување за заедницата на Преспа и културното наследство благодарение на работата на Општина Пустец и партнерите. Заврши процесот на реставрација на црквата „Света Богородица“ на островот Мал Град. На виделина излегоа дел од извонредните византиски фрески, а беше поставен надворешна врата изработена според оригиналната која се наоѓа во музејот на средновековната уметност во Корча, објави Пали Колефски градоначалник на Пустец.
Исто така санирана е и патеката до неа и поставено осветлување со што се добива „прекрасен панорамски поглед и ги евидентира уметничките и архитектонските вредности на објектот“.
- Проектот кој е продолжение на проектот „SmartCulTour“е финансиран од Европската Унија преку ИПА Програмата за прекугранична соработка, со ангажман на општините Битола и Пустец, Дирекцијата на музеите на Битола, Регионалната дирекција за културно наследство Корча и Младинскиот културен центар – Битола. Оваа соработка ја подигна на ново ниво релацијата меѓу нашите институции и држави, посочува Колефски.
Пештерската црква „Света Богородица“, со својот фрескоживопис отскокнува од другите пештерски цркви расфрлани по бреговите на Преспанското и Охридското Езеро. Врз основа на записите сочувани на неа, оваа црква претрпела три измени. Во првиот натпис пишува дека основач на црквата е Бојко
со жена му Евдокија во 1345 година. Во вториот натпис, пишува дека црквата е возобновена во 1369 година од Кесар Новак, неговата жена Кали, неговиот син Амирал и неговата ќерка Марија. Третиот натпис датира во 1607 година, кога е насликана надворешната западна фасада. Внатрешноста на црквата е целосно живописна и е доста позната по ѕидните фрески од византискиот палеолошки стил.
Островот Мал Град се наоѓа на три километри североисточно од Пустец, на југоисточниот брег на Преспанското Езеро. вт/цр
Фото: Општина Пустец
