Директорот на ЈП ЖРСМ Инфраструктура Зоран Трифуновски на 72. Генерално собрание на ЦЕР
- Директорот на ЈП ЖРСМ Инфраструктура Зоран Трифуновски е во тридневна посета на Гдањск, Полска, каде што се одржува 72-то Генерално собрание на Заедницата на европски железнички и инфраструктурни компании, соопштија од ЈП ЖРСМ Инфраструктура.
![Директорот на ЈП ЖРСМ Инфраструктура Зоран Трифуновски на 72. Генерално собрание на ЦЕР](https://mia.mk/images/20230920150136_big_730x400_38.webp )
Скопје, 20 септември 2023 (МИА) - Директорот на ЈП ЖРСМ Инфраструктура Зоран Трифуновски е во тридневна посета на Гдањск, Полска, каде што се одржува 72-то Генерално собрание на Заедницата на европски железнички и инфраструктурни компании, соопштија од ЈП ЖРСМ Инфраструктура.
Извршните директори на железниците во Европа се собраа по повод 72-то Генерално собрание на Заедницата на европски железнички и инфраструктурни компании (ЦЕР), за да ги проценат и дефинираат приоритетите за работата на асоцијацијата во наредната година.
Генералното собрание, чиј домаќин е полската државна железница, беше одбележан и со изборот на Комитетот за управување со ЦЕР 2024-2025 година, бидејќи сегашниот мандат истекува до крајот на оваа година.
Извршниот директор на Заедницата на европски железнички и инфраструктурни компании, Алберто Мацола моментално е на средината од својот втор мандат како извршен директор и неговиот мандат е обновен за уште две години, започнувајќи од 1 јануари 2025 година.
Андреас Мата, извршен директор на Австриските федерални железници (ÖBB), е реизбран за претседател на Заедницата на европските железнички и инфраструктурни компании (ЦЕР) за уште еден двегодишен мандат. Ова ќе биде негов трет мандат на чело на Заедницата и беше на едногласно барање на Управниот одбор на ЦЕР.
Крис Питерс, потпретседател на Европската инвестициска банка (ЕИБ), се приклучи на состанокот на Асоцијацијата со цел да сподели и размени мислења за високото ниво на инвестиции потребни, особено во железничката инфраструктура, за поддршка на Зелениот договор и неговите цели.
Генералното собрание, исто така избра двајца нови членови на Управниот одбор на Заедницата на европски железнички и инфраструктурни компании за преостанатиот дел од сегашниот мандат, Раул Бланко Дијаз, извршен директор на РЕНФЕ и г-дин Риналдс Певниекс, извршен директор на Летонски железници. ра/лв/
ФОТО: ЈП ЖРСМ Инфраструктура-Скопје