• недела, 23 јуни 2024

Дипломи за 103 студенти кои ја завршија Програмата за изучување на холокаустот на УКИМ

Дипломи за 103 студенти кои ја завршија Програмата за изучување на холокаустот на УКИМ

Скопје, 22 мај 2024 (МИА) - На Правниот факултет „Јустинијан Први“ свечено беа доделени дипломите за завршените универзитетски курсеви за изучување на холокаустот. Оваа програма се реализираше во учебната 2023/24 година со поддршка на Конференцијата за еврејските материјални побарувања од Германија од Њујорк.

На свеченото доделување што се одржа вчера, се обратија деканот на Факултетот, проф. д-р Сашо Георгиевски, амбасадорката на СР Германија Петра Дрекслер и раководителот на универзитетската програма проф. д-р Мишо Докмановиќ.  

Деканот Георгиевски го изрази неговото задоволство од реализацијата на програмата како и големиот интерес на студентите. Во таа насока, тој нагласи дека 103 студенти од целиот универзитет ги следеа новите шест курсеви за изучување на холокаустот што претставува исклучителен резултат.     

Германската амбасадорка Дрекслер ја нагласи важноста на соочувањето со историјата и Холокаустот и им се заблагодари на студентите и одговорните на Универзитетот за нивниот ангажман.

Раководителот на универзитетската програма за изучување на холокаустот, проф. д-р Докмановиќ потенцираше дека Универзитетот „Св. Кирил и Методиј“ во Скопје е еден од двата европски универзитети кои го добија престижниот грант на Конференција на еврејските материјални побарувања од Германија – Њујорк, што овозможува реализација на програмата на курсеви во следните три академски години.

Пријавувањето за следниот циклус на програмата ќе започне во септември 2024 година, наведуваат од Правниот факултет „Јустинијан Први“. вг/

Фото: Правен факултет „Јустинијан Први“

 

Остани поврзан