Скопје, 18 септември 2023 (МИА) - Делегација на Генералната дирекција на водостопанство на Република Турција, денеска ќе одржи координативна средба со Министерството за животна средина и просторно планирање во однос на теренските посети и анализи за решавање на проблемот со вода за пиење на одредени населени места во источна Македонија, како и подобрување на водната инфраструктура во истите места, известуваат од Амбасадата на Република Турција во Скопје.

-Делегација на Генерална дирекција на водостопанство на Република Туркије во согланост со потпишан Меморандум за разбирање во областа на водата помеѓу Република Туркије и Република Северна Македонија во 2022 година и во рамки на активности на Заедничкиот комитет за вода основан согласно споменатиот Меморандум, во периодот 17-24 септември 2023 ќе реализира теренски посети во 22 населени места во источна Македонија, односно во општините Василево, Валандово, Штип, Чашка, Дојран, Радовиш и Струмица, со цел вршење на теренски анализи за решавање на проблемот со вода за пиење на одредени населени места во источна Македонија, како и подобрување на водната инфраструктура во истите места, стои во соопштението на Амбасадата.

Оттаму информираат дека координативната средба ќе биде од 09:00 до 10:00 часот, а потоа делегацијата ќе се упати кон Општина Василево, како првата точка во рамки на  теренските активности.

Делегацијата утре ќе биде во Општина Радовиш, во среда во општините Дојран и Струмица, во четврток во Општина Валандово и петок во Општина Штип каде што ќе има и официјални состаноци со претставниците на општините. сх/лв/

Фото: Амбасада на Република Турција во Скопје