Ливерпул, 31 август 2020 (МИА) - На Ливерпул ќе му треба амбициозен и подготвен тим доколку сака да одговори на тешкиот физички и ментален напор следната сезона, изјави дефанзивецот Џо Гомез во интервју за веб-страницата на клубот. За две недели „црвените“ ќе започнат со одбрана на титулата против дебитантот во елитата Лидс Јунајтед. - Паузата беше многу кратка, потоа имавме рестартирање на сезоната и сега ќе одмориме уште две недели. Сепак, мислам дека тоа нема да влијае врз нас, затоа што тренерот веќе нè убеди дека борбата е претежно ментална, а не физичка. Ќе бидеме подготвени. Имаме тим кој е целосно способен да игра во ротација во моментите кога е потребно. Најважно е што во главите сме подготвени .Гледам со свои очи дека сите се гладни за успех, рече тој. Исто како и минатата сезона, Ливерпул играше во нивниот прв натпревар за Суперкупот (Комојунити шилд) и истиот заврши со пенали. Овој пат, сепак, „црвените“ загубија од Арсенал. - Создадовме неколку позиции и Мо (Салах) и Таки (Минамино) беа многу активни на целиот терен. Ова се позитивни работи на натпреварот, но има и многу други на кои треба да се обрне внимание. Сега ќе мора да се разделиме поради репрезентативните обврски, но некои момци ќе останат на Мелвуд и ќе работат за време на паузата. Тие исто така ќе ни помогнат да ги прилагодиме овие мали детали за да бидат подготвени во вистинско време, додаде дефанзивецот на Ливерпул.