Белград, 1 ноември 2025 (МИА) - Претседателот на Србија, Александар Вучиќ, денеска во црквата Свети Сава, во 11 часот, ќе присуствува на помен и молитва за жртвите од падот на бетонската настрешница пред една година во Нови Сад кога загинаа 16 луѓе.

Српскиот патријарх Порфирије ќе служи во храмот парастос за жртвите од трагичната несреќа на железничката станица во Нови Сад, како и за сите починати православни христијани по повод Задушница, соопшти СПЦ.
Претседателот Вучиќ во своето обраќање вчера до граѓаните изјави дека денеска, на годишнината од падот на бетонската настрешница во Нови Сад, ќе оди во црква и ќе запали свеќа за секоја од 16-те жртви на таа трагедија и ги повика сите луѓе да го сторат истото, како и да покажат почит кон нив и едни кон други, и денот да помине мирно.
Во Соборниот храм во Нови Сад, утрово почна литургијата по повод Митровденска задушница, по што ќе се одржи парастос за загинатите при падот на бетонската настрешница на железничката станица во Нови Сад, како и за сите починати православни христијани. зш/