Струмица, 25 ноември 2022 (МИА) - Со осветлување на општинската зграда во Струмица во портокалово почна кампањата за 16 денови активизам за борба против семејното и родово базирано насилство. На настанот, на кој присуствуваа жени-активистки организирани во Здружението „Скај плус“ и граѓани, беше истакнато дека Општина Струмица е прва општина во Република Северна Македонија која од сопствен родово одговорен буџет издвојува финансиски средства за функционирање на лиценцираниот Шелтер центар за згрижување жени и деца жртви на семејно насилство. Тоа го потенцираше и градоначалникот Костадин Костадинов, кој во изјавата за медиумите подвлече дека на територијата на Општината делува и психо-социјално советувалиште, кое им овозможува поддршка на жртвите, препознавање на насилство, излегување од насилната средина, закпрепнување, социјализација и нов почеток. Тој најави и отворање на „Куќа за отворено домување“. -Овој модел има за цел да обезбеди долготрајно и безбедно домување, стабилно вработување и приходи, надминување на траумите од преживеаното насилство како и живот без насилство врз жртвата која ја напуштила насилната средина заедно со нејзнините деца. Како општина нема да дозволиме жените и децата кои се во ризик да ни станат бездомници. „Куќата за отворено домување“ ќе обезбедува домување од 6 до 24 месеци, рече Костадинов. Инаку, 25 ноември е Mеѓународен ден против насилство врз жените и со него започнува кампањата за активизам против насилство за жените. Кампањата завршува на 10 декември кога се одбележува Меѓународниот ден на човековите права. рт/аа/