Неготино, 15 март 2020 (МИА) - Во Неготино се одржа координативен состанок за доследно почитување на мерките за превенција од коронавирус, соопштуваат од неготинската општина. На состанокот биле присутни претставници од институции,  воспитно-образовни установи, ЈЗУ „Здравствен дом “, Полициска станица Неготино, ЈП „ Комуналец “ Црвен Крст, Противпожарна единица, претставници од Советот на општината. - Согласно добиените информации од одговорните од секоја од установите, а следејќи ги мерките на Владата на Република Северна Македонија, донесени се дополнителни заклучоци, препораки и апел кон локалното население за целосно и доследно почитување на неколку мерки. Да не се шири паника и страв меѓу локалното население, бидејќи во Неготино во моментов нема заразен од коронавирусот и да се придржуваме кон мерките и правилно да ги применуваме, информираат од  општината. Со цел поголема превенција на повозрасните граѓани кои спаѓаат во ризичната група, формиран е мобилен тим за помош кој ќе пазари наместо постарите и изнемоштени лица. Секој граѓанин од наведените категории кој ќе има потреба од набавка на лекови, прехранбени производи и средства за лична хигиена,  ќе може да се јави на телефонскиот број 043/ 361 045. - Сите институции и приватни фирми од општина Неготино да користат средства за редовна дезинфекција и хигиена за вработените, за  странките кои доаѓаат од надвор и да одржуваат редовна хигиена и дезинфекција на просториите. Одговорните на воспитно-образовните установи и училиштата да воспостават посилна координација со родителите на децата и учениците и да апелираат  на изолација во домашни услови, појаснуваат од прес службата на општина Неготино. Меѓу мерките е и таа, локалното население да се едуцира за правилно користење на маски, ракавици и други заштитни средства, преку делење на едукативни флаери и преку социјалните мрежи. За пријавување на лица кои доаѓаат од критични подрачја а не се самоизолирале, граѓаните може да пријават на телефоните на полицијата. ПЕ на Министерството за економија е задолжено да преземе засилена инспекциска контрола, а Црвениот Крст да ги разгледа можностите за  преземање на поинтензивни активности во правец на поголемо информирање и  поголема  превентивна заштита на локалното население. -Трговците и другите продавачи за време на пазарните денови  задолжително да користат заштитни дезинфекциони средства, а  такси превозниците и другиот локален превоз на патници да ги редуцира линиите и истовремено да врши редовна дезинфекција во превозните средства. Посебно се потенцира за засилена и  редовна дезинфекција и заштита на работниците кои се превезуваат со автобусите на работа во Дрекслмајер Кавадарци, како би се намалил ризикот и можноста за евентуална зараза. Секоја институција да направи тампон зона за прием на странки и документи. ПС ОН Неготино  да има засилена контрола на влезовите и излезите од градот, да спречува собирање на големи групи на млади на јавни места, паркови, бензински пумпи и  слично. ,,Комуналец и ТППЕ  да вршат редовно миење и дезинфекција на фрекфентните улици во општината.  Локалното население да ја подигне јавната чистота преку сопствено делување и грижа за животната средина. Редовно проветрување, чистење и хигиена во просторот во кој се престојаува или работи подолго време, стои во мерките. Се апелира населението доследно да ги почитува мерките на Владата, а посебно мерката за самоизолација. - Согласно мерките на Владата, физичките и правните лица што не ги почитуваат и кои ги прекршуваат препораките,  ќе бидат казнети согласно член 205 и 206 од Кривичниот законик, додаваат оттаму. свд/