• среда, 24 април 2024

„Волстрит џурнал“: САД подготвуваат нова пратка оружје за Израел

„Волстрит џурнал“: САД подготвуваат нова пратка оружје за Израел

Вашингтон, 17 февруари 2024 (МИА) - Администрацијата на американскиот претседател Џозеф Бајден се подготвува да испрати авионски бомби и друго оружје во Израел за да го зајакне воениот арсенал на таа држава, иако САД се залагаат за прекин на огнот во Газа.

Според Волстрит џурнал, предложената пратка вклучува околу илјада бомби MK-82, и комплети за наведување JDAM за да се направи муницијата попрецизна, пакет што се проценува дека вреди десетици милиони долари.

„Предложената испорака се уште се разгледува внатрешно од официјални лица, а деталите за предлогот би можеле да се променат пред администрацијата да го извести конгресниот комитет одговорен за одобрување на трансферот“, пишува весникот, повикувајќи се на сегашни и поранешни американски функционери.

Во извештајот се наведува и проценката на предлогот на американската амбасада во Ерусалим, во која се вели дека израелската влада бара „брзо стекнување на тие средства за да го одбрани Израел од тековните и новите регионални закани“. зш/

Остани поврзан