Берлин, 6 мај 2025 (МИА) – Конзервативниот политичар Јохан Вадефул, кој треба да стане следниот министер за надворешни работи на Германија, застана во одбрана на партискиот лидер Фридрих Мерц, кој не успеа да биде избран за канцелар во првиот круг гласање во парламентот.

Иако Мерц е првиот кандидат за канцелар кој некогаш не успеал да го помине последниот чекор, Вадефул забележа дека во минатото биле потребни неколку круга на гласање за да се изберат премиери на германски покраини.

- Тоа се случувало и во други покраини. И кој денес уште зборува за тоа дали успеало во првиот или вториот круг на гласање, рече политичарот од Христијанските демократи во Берлин, одговарајќи на прашањето дали Мерц сега е политички оштетен.

Вадефул исто така изрази жалење што Мерц не успеа да обезбеди апсолутно мнозинство од најмалку 316 гласови во 630-члениот долен дом.

- На крајот, изборот, кој се одржа со тајно гласање, беше одлука заснована на совест, која за жал испадна како што испадна, додаде Вадефул.

Сега пратениците ќе мора „повторно да се погледнат себеси“, рече тој, додавајќи дека е „уверен“ дека Мерц ќе успее во следниот круг. јт/

Фото: Вадефул на Х