Скопје, 8 октомври 2023 (МИА) - На Меѓународниот театарски фестивал „Скупи фестивал“ вечерва во Албанскиот театар Скопје ќе се одигра перфомансот „Бура и продор” произлезен од шестдневната работилница одржана со режисерката Теа Беговска.

„Sturm und drang“ (Бура и продор) е движење во уметноста кое донело нови форми кои силно продреле во делата на големите автори.

- На оваа работилница се потрудивме да продреме во нашето време и да искреираме театарски перформанс во кој ќе ја видите „Бурата и продорот“ на младите актери Илин Јовановски, Миа Кантарџиева Петровска, Дин Ибрахим, Бојан Лазаров, Тодор Стојковски, Дениз Рустеми. И ова претстава ќе се одигра во Албанскиот театар Скопје во 20 часот, соопштуваат од Фестивалот.

На програмата на МТФ „Скупи фестивал“ вчера беше одиграна театарската претстава „Скршено на парчиња” на театарот „La Belle Meunière“ од Франција.

-„Шведска маса / Скршено на парчиња“ личи на торба за пазар, но како бонус добивате торба која мириса на чад од експлозија. На сцената гледаме двајца бурлескни актери кои потсетуваат на познатото комедијанско дуо Лорел и Харди, кои носат убаво и внимателно спакувано парче мебел кои ќе претрпи жесток и комичен масакар, сè додека не се сруши целосно на прачиња. На крајот публиката е поканета да учествува во спојувањето на овие парчиња од мебел, а со тоа да открие дека всушност ништо не е изгубено. Во овој циклус т.н. живот во кој се меша трагедијата и бурлеската, сфаќаме дека се’ може да добие своја смисла, соопштија од  МТФ „Скупи фестивал“. фф/бак/

Фото: МТФ Скупи фестивал