Адис Абеба, 10 септември 2021 (МИА) - Раководството на Африканската унија денеска објави дека го суспендирале членството на Гвинеја во таа организација откако војската го собори од власт претседателот Алфа Конде, јавува Анадолија. Советот за мир и стабилност при Африканската унија објави на Твитер дека Гвинеја е суспендирана од сите активности на Унијата и нејзините тела за носење одлуки. Советот го покани претседателот на Комисијата на Африканската унија Муса Факи да контактира и да се консултира со сите релевантни партнери во регионот. Воената хунта составена од специјални сили соопшти во неделата дека го соборила од власт претседателот Алфа Конде поради загриженост за сиромаштијата и корупцијата поради лошата организација. ссм/