Скопје, 18 октомври 2022 (МИА) - Во втората половина на 2023 година граѓаните на Градот Скопје ќе имаат бесплатен јавен превоз, токму онака како што беше ветено, рече денеска на прес-конференцијата градоначалничката на Град Скопје Данела Арсовска. Арсовска, одговарајќи на новинарско прашање, посочи дека јавниот превоз ќе биде целосно бесплатен, како што беше најавено во програмата. Сепак, како што рече, треба сите институции да си ги почитуваат обврските и да ги исплатат своите долгови. -Проблемот е во сите оние во оваа држава, кои што не си ги почитуваат обврските. Меѓутоа, со опструирање од страна на сите институции во државата, кои што 30 години ја „изедоа“ оваа држава, ние не можеме да градиме ниту поквалитетен град, ниту поквалитетна држава. Секој треба да си ја носи својата обврска и одговорност, а тоа значи доколку некој должи над два милиони евра не треба да прашува како ќе има бесплатен јавен превоз, туку треба да си ги плати своите обврски. Истото се однесува и за централната и за оние единици на локалната власт кои не си ги подмируваат своите обврски, рече Арсовска. бт/нд/