Москва, 14 декември 2025 (МИА) – Анкета на финансискиот пазар „Сравни“ открива изненадувачки резултати за перцепцијата на Дедо Мраз меѓу руските граѓани. Речиси една третина од анкетираните, во примерок од 1.500 лица од сите делови на Русија, сметаат дека Дедо Мраз е реална личност.

Иако традиционално се поврзува со подароци и материјални работи, анкетата покажа дека приоритетите на Русите се промениле. Денес, кога би имале можност да му пишуваат на Дедо Мраз, материјалните добра би зазеле второ место.

Само 12 отсто од испитаниците би побарале конкретни подароци, како куќа или патување. Значаен процент, 35 отсто, би се фокусирале на личната, нематеријална среќа, барајќи мир и благосостојба за себе и своите блиски.

Меѓутоа, доминантниот тренд покажува дека руските граѓани се свртени кон колективните вредности. Мнозинството, дури 53 отсто од испитаниците, би го искористиле писмото до Дедо Мраз за да изразат желби кои се однесуваат на јавното добро. Овој резултат открива длабока желба за мир и правда во општеството, што укажува на колективна свест и грижа за благосостојбата на земјата.

„Што се однесува до самото постоење на новогодишниот волшебник, многумина го задржуваат ова верување во чуда дури и во зрелата возраст. Според податоците од анкетата, 30 отсто од испитаниците сè уште го доживуваат Дедо Мраз како реален лик и дел од новогодишните чуда“, се наведува во текстот, пренесува агенцијата ТАСС.

Според резултатите од анкетата, повеќе од една третина (34 отсто) од испитаниците рекле дека верувале (или сè уште веруваат) во Дедо Мраз и откако наполниле десет години. Повеќето испитаници (60 отсто) уште како деца сфатиле дека ликот од бајките не постои.

Кога биле прашани за воспитувањето на децата, 63 отсто од испитаниците рекле дека вистината треба да излезе на виделина спонтано. Уште 30 отсто веруваат дека верувањето треба да се зачува што подолго за да се негува детската фантазија, а седум отсто сметаат дека е подобро веднаш да се каже вистината. ссм/

фото: архива