Ќе се подготвува техничка документација за три кружни крстосници во Делчево
- Во рамки на добиениот грант за аплицираниот проект „Подобрување на сообраќајните услови и безбедноста во сообраќајот преку изградба на кружни крстосници во градот Делчево“, ќе се изработува техничка документација за изградба на три кружни крстосници во Делчево.
![Ќе се подготвува техничка документација за три кружни крстосници во Делчево](https://mia.mk/index.php/images/20231120144724_big_730x400_63.webp )
Делчево, 20 ноември 2023 (МИА) – Во рамки на добиениот грант за аплицираниот проект „Подобрување на сообраќајните услови и безбедноста во сообраќајот преку изградба на кружни крстосници во градот Делчево“, ќе се изработува техничка документација за изградба на три кружни крстосници во Делчево. Активноста како што и формираа од Општината се реализира во рамките на проектот „Градење на општинските капацитети за имплементација на проекти-фаза 2“, финансиран од Шведската агенција за меѓународна соработка СИДА и Бирото за регионален развој, со поддршка на УНДП.
Договорот за финансирање на техничката документација денеска го потпиша градоначалникот Горан Трајковски на настан организиран од УНДП-Програма за развој на Обединетите нации, при што нагласи дека оваа техничка документација ќе овозможи услови за изградба на предвидените крстосници кои се во насока на подобрување на безбедноста во сообраќајот.
- Потребата од изградба на кружни крстосници на транзитниот булевар „Македонија“ кој поминува низ фреквентен дел од градот, е голема и претставува единствено решение за намалување на ризиците во сообраќајот. Со поддршка на донаторите, а почитувајќи ги сите стратешки документи на Општина Делчево, како и мерките предвидени во Акцискиот план на Стратегијата за безбедност на патишта, ќе изработиме техничка документација за изградба на три кружни текови на булеварот и тоа на три критични крстосници, каде често се случуваат и сообраќајни незгоди, нагласи Трајковски.
Договорот беше потпишан во присуство на раководителот на СИДА, Микаел Атерхог, министерот за локална самоуправа, Ристо Пенов, директорот на Бирото за регионален развој, Рамиз Реџепи, како и градоначалници од 10 општини и директори на центри за плански развој.
Во однос на изградбата на трите кружни крстосници како што додадоа од Општината истите ќе се проектираат на соодветни локации за таа намена.
- Првата кружна крстосницата се наоѓа помеѓу улиците „Индустриска“„Македонска“ и булевар „Македонија“ лоцирана помеѓу индустриска и станбена зона. Втората крстосница е помеѓу улица „Методи Митевски Брицо“ и булевар „Македонија“ на која се регулира сообраќајот со семафори и хоризонтална и вертикална сигнализација и третата крстосница е помеѓу ул. „Скопска“, ул. „Методи Митевски Брицо“ и Булевар „Македонија“ и се наоѓа во станбена зона во која е лоциран и Здравствениот дом Делчево, информираа од Општината
Вкупната вредност на проектот е 1.995.480 ден, а Општина Делчево има сопствено учество во вкупната сума од 20 проценти. вс/ир
Фото: МИА