Штипските средношколци од угостителско-туристичката струка учеа од најдобрите готвачи на Балканот
- Учениците од угостителско-турстичката струка од средното општинско училиште „Коле Нехтенин“ денеска можеа да ги слушнат најголемите готварски тајни од врвни готвачи од Хрватска, Словенија, Србија и Црна Гора.
![Штипските средношколци од угостителско-туристичката струка учеа од најдобрите готвачи на Балканот](https://mia.mk/index.php/images/20231010171628_big_730x400_82.webp )
Штип, 10 октомври 2023 (МИА) - Учениците од угостителско-турстичката струка од средното општинско училиште „Коле Нехтенин“ денеска можеа да ги слушнат најголемите готварски тајни од врвни готвачи од Хрватска, Словенија, Србија и Црна Гора.
Целта на денешниот настан е да се подигне свеста на гастрономијата, угостителството и туризмот и младите вешто да чекорат по патот на готвењето. Стево Карапанџа, Драгица Лукин, Исток Легат и потпреседателот на Светската организација на готвачи Уве Мишел, заедно со средношколците готвеа во училишната кујна на СОУ „Коле Нехтенин“.
-Најмногу ме инспираат учениците. На нивните лица видов заинтересираност. Ова што го презентиравме денеска е еден мал дел од она што можеме да им покажеме. Забележав една голем заинтересираност кај учениците, што е многу позитивно„ изјави Стево Карапанџа.
Потпретседателот на Светската организација на готвачи оцени дека учениците сакаат да ги учат тајните на готвењето.
- Кај средношколците кои ги запознав денеска видов голем потенцијал и верувам дека се на вистинското место. Единствено што треба да им дадеме е можност за учење, истакна Мишел.
Денешниот настан е во организација на Националната асоцијација на готвачи „Гастромак“.
- Ова го направивме со единствена цел да се подигне гастрономската свест во Македонија и да работиме на темата како да ги задржиме идните готвачи кои се од огромно значење за нашата земја. Токму тоа беше целта на овие предавања, кои се тајните на гастрономијата и што сѐ треба да знаеме, да се направи за да се стане добар готвач, вели Адријана Алачки.
Готвачите им ги пренесоа на средношколците своите инспиративни биографски приказни и со тоа посочија колку е тешко, но истовремено и прекрасно, да се носи белата готвачка униформа која им овозможила да се стекнат со знаења и искуства од целиот свет. вдј/бак/
Фото: МИА