Француската влада користи специјална уставна процедура за да го заобиколи Собранието за пензиската реформа
- Француската Влада ќе прибегне кон специјална уставна процедура за да ја протурка контроверзната пензиска реформа без гласање во Парламентот, изјави владин извор за француски медиуми.
![Француската влада користи специјална уставна процедура за да го заобиколи Собранието за пензиската реформа](https://mia.mk/index.php/images/20230316161000_big_730x400_56.webp )
Париз, 16 март 2023 (МИА) - Француската Влада ќе прибегне кон специјална уставна процедура за да ја протурка контроверзната пензиска реформа без гласање во Парламентот, изјави владин извор за француски медиуми.
Процедурата според член 49, точка 3 од Уставот ќе дозволи возраста за пензионирање да се зголеми на 64 години, но покажува дека претседателот Емануел Макрон и неговата Влада немаат мнозинство во Националното собрание за таа мерка.
Како што е наведено, потегот на Владата најверојатно дополнително ќе ги разгневи синдикатите, демонстрантите и левичарската опозиција, кои велат дека пензиската реформа е неправедна и непотребна.
„Оваа влада не е достојна за Петтата република и француската демократија. Парламентот е шиканиран, понижуван до крај“, рече Фабиен Русел, лидер на Комунистичката партија.
Лидерот на социјалистите Оливие Фор рече дека таквиот потег би можел „да предизвика неконтролиран гнев“ по неколкунеделни штрајкови и протести.
Опозициските партии најверојатно ќе бараат гласање за доверба на Владата, но тешко дека ќе помине со оглед на тоа што повеќето конзервативни пратеници ја поддржуваат, јавија француските медиуми.
Макрон и Владата велат дека е неопходно подоцнежно пензионирање за да се извади пензискиот систем од „црвеното“ до крајот на деценијата.
Неуспехот на Макрон да обезбеди мнозинство за да ја усвои пензиската реформа не само што е сериозен удар за неговите реформски напори, туку може да уништи голем дел од политичкиот капитал за продолжување на вториот претседателски мандат кој истекува во 2027 година, пренесуваат агенциите. паг/