Фон дер Лајен: Ако ЕУ и САД го водат патот, тоа ќе биде сигнал за остатокот од светот
- Претседателката на Европската комисија, Урсула фон дер Лајен денеска изјави дека Соединетите Американски Држави, со промената на администрацијата во Вашингтон, се вратиле на глобалната сцена
![Фон дер Лајен: Ако ЕУ и САД го водат патот, тоа ќе биде сигнал за остатокот од светот](https://mia.mk/index.php/images/20221106115625_big_730x400_63.webp )
Минхен, 19 февруари 2021 (МИА) - Претседателката на Европската комисија, Урсула фон дер Лајен денеска изјави дека Соединетите Американски Држави, со промената на администрацијата во Вашингтон, се вратиле на глобалната сцена и ги повика на „природно партнерство“ и „глобално лидерство“ со ЕУ.
- Заедничката работа на новата глобална агенда, со повеќе глобално ориентирани САД и поспособна ЕУ, е начин да одговориме на предизвиците и Европа е подготвена на тоа, рече Фон дер Лајен.
Говорејќи за новите трансатлантски односи на Конференцијата за безбедност во Минхен (МСЦ), Фон дер Лајен истакна дека ЕУ и САД можат заеднички да ја водат глобалната борба против климатските промени, но исто така да работат и на дигитализација и воспоставување правила во дигиталната економија, кои ќе бидат почитувани низ целиот свет, а засновани на почитување на човековите права и заштита на приватноста.
Претседателката на ЕК оцени дека новото трансатлантско партнерство е особено важно во време кога Кина е економски посилна, а Русија, како што тврди, „се повеќе ги крши човековите права, како во нејзината земја, така и на меѓународната сцена“.
- На ЕУ и на САД е да ја зајакнат соработката како докажани партнери и сојузници. Ако ние го водиме патот, тоа ќе биде сигнал за остатокот од светот, заклучи Фон дер Лајен.
Таа истакна дека „партнерството САД-ЕУ е добро, не само за трансатлантските односи, туку и за иднината на децата од двете страни на Атлантикот“. паг/