Рим, 25 март 2024 (МИА) - Ескалацијата на кризата во Црвено Море ќе го забрза зголемувањето на трошоците за испорака, ќе го одложи снабдувањето со основна храна или ќе доведе до целосно затворање на трговските патишта и затворање на јеменските пристаништа, се наведува во новиот извештај на Организацијата за храна и земјоделство на Обединети нации (ФАО).

ФАО наведува ддека тоа ќе доведе до натамошно зголемување на несигурноста во храната во Јемен, што во голема мера ќе влијае на најранливите групи на населението, вклучително и сиромашните и внатрешно раселените, кои тешко ќе ги добијат основните прехранбени производи.

Според извештајот, „Потенцијални влијанија од ескалацијата на кризата во Црвено Море врз прехранбената несигурност во Јемен“, состојбата со безбедноста на храната во земјата е веќе кревка и понатамошните шокови кои произлегуваат од кризата во Црвено Море дополнително ќе ја влошат страшната ситуација. што може да се опише како една од најлошите хуманитарни итни случаи во светот.

Јемен во голема мера се потпира на увоз за да го прехрани своето население, при што околу 90 отсто од неговите основни потреби за жито се увезуваат. Според извештајот на ФАО, доколку сегашната ескалација продолжи во следните три месеци, увозот најверојатно ќе се забави, што ќе влијае на достапноста на храната и цените на домашните пазари.

Коментирајќи го извештајот, претставникот на ФАО во Јемен, Хусеин Гадаин ја повика меѓународната заедница да преземе мерки против можното влошување на и онака тешката хуманитарна криза во земјата. Тој нагласи дека конфликтот во Црвеното Море избувна во време кога вниманието на Јемен опаѓа бидејќи хуманитарните агенции го насочуваат своето внимание и ресурси кон други глобални жаришта, вклучувајќи ги Украина, Газа и Судан.

- Не можеме да си дозволиме да чекаме додека хуманитарната вонредна состојба дополнително не се влоши. Сега е време да се координираат напорите и да се деескалира кризата во Црвено Море, посочи Гадаин.

Според него, треба да се олесни континуираниот проток на комерцијални и основни хуманитарни резерви на храна.

- Оваа криза, ако не се реши, се заканува да го избрише напредокот што го постигнавме во обновата на егзистенцијата на Јеменците од почетокот на конфликтот пред осум години, нагласи Гадаин.

Извештајот предупредува дека понатамошната ескалација на кризата ќе ја наруши егзистенцијата. Рибарите, на пример, може да се откажат од своите работни места поради зголемена несигурност на море и на пристаништата.

Исто така се посочува оти зголемените воени активности во Црвеното Море би можеле да доведат до уништување на критичната инфраструктура, вклучително и пристаништата и магацините, што дополнително ќе ја попречи ефективната дистрибуција и складирање на храна во земјата и ќе ја влоши несигурноста на храната. ми/

фото: МИА архива