Уставен поведе постапка за Одлуката за условите и начинот на давање под закуп на недвижен имот во сопственост на Град Скопје
- -Во оваа фаза од постапката Уставниот суд изразува сомнеж дека Одлуката е спротивна на одредби од Уставот и Законот за локална самоуправа. Според Судот, меѓу другото спорно е што стварите во општинска сопственост може да се дадат на користење по пат на јавно наддавање, а врз основа на одлука на установата и со предлог на директорот на установата, што не е во согласност со одредби од Законот за користење и располагање со стварите во државна сопственост и со стварите во општинска сопственост и со Законот за локална самоуправа, се наведува во денешното соопштение од Уставниот суд.
![Уставен поведе постапка за Одлуката за условите и начинот на давање под закуп на недвижен имот во сопственост на Град Скопје](https://mia.mk/index.php/images/20240118173145_big_730x400_34.webp )
Скопје, 18 јануари 2024 (МИА) - Уставниот суд на вчерашната седница одлучи да поведе постапка за оценување на уставноста и законитоста на Одлуката за условите и начинот на давање под закуп на недвижен имот во сопственост на Град Скопје. Иницијативата до Судот е поднесена од градоначалниката на Град Скопје, Данела Арсовска.
-Во оваа фаза од постапката Уставниот суд изразува сомнеж дека Одлуката е спротивна на одредби од Уставот и Законот за локална самоуправа. Според Судот, меѓу другото спорно е што стварите во општинска сопственост може да се дадат на користење по пат на јавно наддавање, а врз основа на одлука на установата и со предлог на директорот на установата, што не е во согласност со одредби од Законот за користење и располагање со стварите во државна сопственост и со стварите во општинска сопственост и со Законот за локална самоуправа, се наведува во денешното соопштение од Уставниот суд.
Дополнително, Уставниот суд изгласа и запирање на извршувањето на поединечни акти или дејствија донесени врз основа на Одлуката, односно воведена е т.н. времена мерка која важи се до донесување на конечната одлука на Судот.
Судот поведе постапка за оценување на уставноста на Правилникот за формата и содржината на лиценцата за изработка на рударски проекти за површинска и подземна експлоатација, преработка на минерални суровини и други рударски проекти од областа на рударството поради сомнеж дека оспорениот акт е неуставен бидејќи со него е повреден членот 52 од Уставот, кој утврдува дека законите и другите прописи се објавуваат во Службен весник на Република Северна Македонија „најдоцна во рок од седум дена од денот на нивното донесување. Иницијативата е поднесена од Кренар Лога.
На вчерашната седница е поведена постапка за оценување на уставноста на Правилникот за формата и содржината на Барањето за остварување на ослободувањето од данок на додадена вредност, увозни давачки и акциза на енергенти и данок на моторни возила за патнички автомобили и потребната документација која треба да се достави кон барањето. Подносител и на оваа на иницијатива е Кренар Лога.
Судот не поведе постапка за оценување на уставноста на членот 12 од Законот за адвокатура, бидејќи не најде повреда на одредбите од Уставот.
-Судот ја отфрли иницијативата во врска со наводите за оценување на член 67 став 2 од Статутот на Адвокатска комора на Република Северна Македонија, бидејќи веќе одлучувал по ова прашање, односно оцени дека се исполнати условите од член 28 алинеја 2 од Деловникот на Судот за отфрлање на иницијативата, се посочува во соопштението.
Предлогот на судијата-известител Фатмир Скендер да не се поведе постапка за оспорениот Регулациски план на Генерален урбанистички план на Град Скопје 2012-2022 од 07.06.2022 година, како што е информираат од Уставен суд, не го доби потребното мнозинство, со што предметот останува отворен и понатаму. дма/бак/
Фото: МИА архива