Улуташ: НАТО го поддржува дијалогот помеѓу Белград и Приштина
- Командантот на КФОР генерал-мајор Озкан Улуташ денеска изјави дека неговата посета на Брисел, каде што се сретна со високи цивилни и воени претставници на НАТО, вклучително и генералниот секретар Јенс Столтенберг, била многу продуктивна и дека ги информирал соговорниците за безбедносната ситуација во Косово и во регионот, како и со приоритетите на КФОР во иднина
![Улуташ: НАТО го поддржува дијалогот помеѓу Белград и Приштина](https://mia.mk/index.php/images/20240424191304_big_730x400_37.webp )
Приштина, 24 април 2024 (МИА) – Командантот на КФОР генерал-мајор Озкан Улуташ денеска изјави дека неговата посета на Брисел, каде што се сретна со високи цивилни и воени претставници на НАТО, вклучително и генералниот секретар Јенс Столтенберг, била многу продуктивна и дека ги информирал соговорниците за безбедносната ситуација во Косово и во регионот, како и со приоритетите на КФОР во иднина.
Тој посочи дека НАТО продолжува целосно да го поддржува дијалогот меѓу Белград и Приштина и ги повика страните да се воздржат од, како што наведе, дестабилизирачка реторика и акции.
Сојузниците и партнерите на НАТО целосно ги поддржуваат нашите секојдневни напори да обезбедиме мирна и безбедна средина за сите заедници кои живеат во Косово и слобода на движење во секое време и на непристрасен начин. Според нашиот мандат, врз основа на Резолуцијата 1244 на Советот за безбедност на ОН од 1999 година, КФОР останува основен столб на безбедноста на цело Косово и регионалната стабилност, нагласи Улуташ. ми/
фото: Википедија