Лондон, 5 август 2024 (МИА) - Маж од американската сојузна држава Вирџинија е обвинет за закана со насилство кон потпретседателката на САД, Камала Харис на социјалните мрежи, набргу откако таа стапила во претседателската кампања, јавува Би-Би-Си.

Френк Кариљо минатиот петок беше обвинет дека објавил заканувачки пораки на конзервативната социјална мрежа GETTR.

Како што е наведено во судските документи, Кариљо е обвинет дека напишал дека Камала Харис „ќе жали што дури се обидела да се кандидира за претседател“ и дека „треба да биде жива запалена“.

-Ќе го направам тоа сам, ако никој друг не го стори тоа, додаде тој во контроверзната објава.

Инспекторите тврдат дека Кариљо „свесно и со предумисла се заканувала дека ќе го одземе животот (на Камала Харис) и ќе и нанесе телесни повреди, јавува Би-Би-Си.

Федералното обвинение цитира неколку други натписи на интернет кои Кариљо ги напишал во кои користел екстремно насилен и заканувачки јазик.

Мета на неговите закани беа американскиот претседател Џозеф Бајден и директорот на Федералното биро за истраги Кристофер Вреј.

Според американските федерални прописи, кој и да му се заканува на претседателот, потпретседателот или други лица во претседателското наследство, се соочува со казна затвор до пет години.

Спорните пораки се датирани од 27 јули, помалку од една недела откако Бајден одлучи да се повлече од трката за реизбор и ја препорача својата потпретседателка Камала Харис за претседателски кандидат на Демократската партија.

Кариљо беше уапсен на 2 август, а агентите на ФБИ заплениле полуавтоматска пушка AR15 и револвер при претрес на неговиот стан, покажуваат судските документи.

Републиканците и демократите го осудуваат сè поизразениот тренд на политичко насилство во САД, особено откако минатиот месец млад човек се обиде да го убие републиканскиот претседателски кандидат и поранешен претседател на земјата, Доналд Трамп, кој беше полесно ранет во тој напад.

GETTR и Гугл соработуваат со ФБИ во истрагата, соопштено е.

GETTR е основан од главниот портпарол на Трамп, Џејсон Мулер. Тој минатата година ја напушти компанијата за да се приклучи на претседателската кампања на Трамп. мс/

фото: ЕПА