Вашингтон, 20 јануари 2026 (МИА) -  Американскиот претседател Доналд Трамп неделава во Давос ќе го промовира Одборот за мир, што е основан како дел од прекинот на огнот во Газа, посредуван од САД, соопшти Белата куќа, пренесе ДПА.

Трамп в четврток ќе ја потпише повелбата за Одборот за мир на маргините на Светскиот економски форум во швајцарскиот зимски центар Давос, каде што в среда попладне ќе се обрати на форумот, пренесува германската агенција.

Европските земји досега реагираа со претпазливост на Одборот за мир на Трамп, со кој ќе претседава самиот тој.

Телото, меѓу другите задачи, ќе се фокусира на обновата на уништениот Појас Газа, ќе го надгледува прекинот на огнот меѓу Израел и Хамас и ќе ја надгледува работата на Комитетот на палестинските технократи задолжени за администрирање на јавните услуги.

Освен главните традиционални европски сојузници на САД, вклучувајќи ги Франција, Германија и Обединетото Кралство, поканети се и рускиот претседател Владимир Путин и турскиот претседател Реџеп Таип Ердоган.

Одборот за мир првично беше дел од втората фаза од мировниот план на Трамп за Газа, потсетува ДПА. Сега постојат индикации дека САД сакаат значително да го прошират својот мандат во промовирање на стабилноста и решавање на конфликти во целиот свет.

Постојат стравувања дека Трамп би можел да се стреми да формира конкурентска организација на Обединетите нации, која тој постојано ја критикуваше како нефункционална.сд/ссм/

фото:МИА архива