Струмица, 15 март 2024 (МИА) - Градоначалниците на Струмица, Костадин Костадинов и на Лесковац, Србија, Горан Цветановиќ, денеска потпишаа Меморандум за збратимување. Карневалската традиција и спортот ги споија двата града, а сега соработката се проширува во повеќе области, како и размената на искуства и позитивни практики во функционирањето на локалните самоуправи.

Говорејќи за досегашната соработка и вредностите што ги имаат Струмица и Лесковац, пред се како градови-економски лидери во своите земји, градоначалникот Костадинов истакна дека сите потенцијали и можности на најдобар начин ќе бидат искористени за благодет на граѓаните од двата града.

-И јас и мојот колега од Лесковац, го гледаме Балканот и ситуацијата на Балканот, како една огромна можност за вистинско обединување на народите, наместо да сееме омраза, да сееме љубов, да сееме смеа, да гледаме среќни граѓани коишто имаат придобивки од нашето ново пријателство, рече градоначалникот Костадинов.

Градоначалникот на Лесковац, Горан Цветановиќ, потенцираше дека по повеќегодишната врска меѓу Струмица и Лесковац во спортот и карневалот, се појавиле нови конекции и заеднички интереси за соработка и во други области.

-Мислам дека како луѓе созреавме и тие наши лични амбиции и лично почитување да ги преточиме во заедничко почитување на граѓаните на Струмица и Лесковац, имаме што да научиме едни од други, имаме со што да си помогнеме и посебно кога конекциите ни се кон ЕУ можеме да имаме заеднички проекти со кои ќе можеме животот на граѓаните да го дигнеме на повисоко ниво, рече градоначалникот Цветановиќ.

Инаку, градоначалникот Цветановиќ и неговиот тим ќе бидат меѓу гостите на главната интернационална карневалска поворка којашто ќе се одржи утре во Струмица.рт/цр

Фото: Општина Струмица