Белград, 14 јули 2020 (МИА) - Група белградски професори, академици и интелектуалци денеска пред платото на Филозофскиот факултет прочитаа проглас, со кој најавија формирање на Собрание на слободна Србија, што ќе биде одговор, како што наведоа, на лажните избори и на лажниот парламент што ја отсликува волјата на еден човек, а не на потребите на општеството. Тие најавија дека Собранието ќе биде составено од проферсионално реализирани луѓе и достоинствени граѓани, кои со работа и однесување би дале придонес за развојот на демократијата во Србија. Професрката Биљана Стојковиќ го прочита прогласот, во кој се наведува дека „Србија не е слободна земја и оти е време граѓаните да се организираат за политичко и активистичко дејствување со цел да се запре уништувањето на земјата и да се обезбеди иднина достојна за човекот“. - Нашето општество е уништено од социјална неправда и се поголем социјален јаз. Ова е држава на разорени институции, претворена во сервис на една партија и на еден човек, истакна Стојковиќ. Таа додаде дека Собранието на слободна Србија ќе подготви „рамки за промена на системот и трансформација на Србија во слободна, демократска, цивилизирана и социјално одговорна заедница на рамноправни граѓани“. ми/