Скопје, 10 март 2023 (МИА) - Министерот за внатрешни работи Оливер Спасовски во рамки на новата иницијатива за отворени денови и отвореност на МВР кон граѓаните, денеска оствари средба со деканот проф. д-р Никола Дујовски, професори и најдобрите студенти од Факултетот за безбедност во Скопје.

На средбата, како што соопштија од МВР, уште еднаш е констатирана одличната соработка помеѓу овие две институции која од 2017 година  постојано се унапредува. 

Министерот Спасовски презентира план за креирање на правна рамка за заедничка соработка во насока на обврска Министерството за внатрешни работи секоја година да вработи одредена бројка на најдобрите студенти од Факултетот за безбедност.

- Во насока на постојано унапредување на транспарентноста на министерството и полицијата почнуваме циклус на отворени денови во МВР каде за студенти, ученици и граѓани ќе ги отвориме вратите на Министерството со цел запознавање на граѓаните со процесите каде се креира и реализира безбедноста на граѓаните и  државата. МВР , дел од  граѓаните го доживуваат  како затворена  институција, а  преку ваквите иницијативи и пракси ќе ја унапредуваме и негуваме довербата на граѓаните и транспарентноста на министерството која е унапредена на значително високо ниво, потенцира министерот Спасовски.

На средбата пред присутните студенти, Спасовски  ја презентира идејата за креирање на правна рамна за соработка помеѓу Министерството и Факултетот за безбедност со која МВР ќе преземе обврска секоја година да бидат вработени одредена бројка на најдобрите дипломирани студенти со цел зголемување на капацитетот на МВР.  

 

 

- МВР е институцијата која се грижи за безбедноста на сите граѓани, се бори со сите видови криминал и го чува општеството безбедно и за тоа ни се потребни најдобрите луѓе со висок интегритет, впрочем какви што креира Факултетот за безбедност, нашата најстара и најреномирана високообразовна институција од областа на безбедносните науки. За да продолжиме да градиме силна институцијата најважни  се луѓето во неа , а Факултетот за безбедност креира најквалитетни кадри од областа на безбедноста. Со оваа иницијатива ја продолжуваме одличната соработка на сите нивоа помеѓу Министерството и Факултетот која ја засиливме од 2017 година и ја унапредуваме постојано, истакна Спасовски. 

Деканот на Факултетот за безбедност, Никола Дујовски, како дел од иницијативата, ја поздрави нејзината реализација и посветеноста на Министерството и министерот Спасовски кон постојано надградување на капацитетите на министерството, во овој случај и со обврска за преземање правна рамка за инкорпорирање во своите редови на најдобрите студенти од факултетот.

 

- МВР и Факултетот за безбедност веќе неколку години се пример како треба да изгледа соработката меѓу институциите. Ние како Факултет и академска средина веќе неколку години заеднички и интензивно учествуваме во креирање на политиките на Министерството со цел пренесување на академското знаење врз практичната реализација на безбедноста на нашата државата. Од 2017 наваму над 280 дипломирани студенти ја продолжиле својата кариера како дел од структурите на Министерството за внатрешни работи,  останува бројка од околу 150 студенти кои ќе имаат можност своите академски знаења да ги реализираат во рамки на министерството. Правната рамка за ваквата соработка ќе значи огромна мотивација за најдобрите студенти да ја реализираат својата кариера во Министерството за внатрешни работи притоа ставајќи се во службата на државата во поефикасна борба со криминалот и градејќи побезбедно општество за сите, истакна деканот Дујовски.

Студентите од Факултетот за безбедност низ своите дискусии изразиле посебна благодарност кон МВР потенцирајќи дека со тоа силно се зголемува нивната мотивација да ги унапредуваат и зголемуваат своите знаења со цел нивна практична реализација на професијата што ја одбрале. цр/сп/

 

 

Фото и видео:МВР